สงฺฆาทิเสส สิกฺขาปุจฺฉา

1. สุกฺกวิสฺสฏฺฐิสงฺฆาทิเสส สิกฺขาปุจฺฉา

ปุจฺฉา – ยํ เตน อาวุโส ภควตา ชานตา ปสฺสตา อรหตา สมฺมาสมฺพุทฺเธน อุปกฺกมิตฺวา อสุจิํ โมเจนฺตสฺส สงฺฆาทิเสโส กตฺถ ปญฺญตฺโตฯ

วิสฺสชฺชนา – สาวตฺถิยํ ภนฺเต ปญฺญตฺโตฯ

ปุจฺฉา – กํ อาวุโส อารพฺภ ปญฺญตฺโตฯ

วิสฺสชฺชนา – อายสฺมนฺตํ ภนฺเต เสยฺยสกํ อารพฺภ ปญฺญตฺโตฯ

ปุจฺฉา – กิสฺมิํ อาวุโส วตฺถุสฺมิํ ปญฺญตฺโตฯ

วิสฺสชฺชนา – อายสฺมา ภนฺเต เสยฺยสโก หตฺเถน อุปกฺกมิตฺวา อสุจิํ โมเจสิ, ตสฺมิํ ภนฺเต วตฺถุสฺมิํ ปญฺญตฺโตฯ

ปุจฺฉา – อตฺถิ อาวุโส ตตฺถ ปญฺญตฺติ อนุปญฺญตฺติ อนุปฺปนฺนปญฺญตฺติฯ

วิสฺสชฺชนา – เอกา ภนฺเต ปญฺญตฺติ, เอกา อนุปญฺญตฺติ, อนุปฺปนฺนปญฺญตฺติ ตสฺมิํ นตฺถิฯ

ปุจฺฉา – กตมา อาวุโส ตตฺถ มูลปญฺญตฺติฯ

วิสฺสชฺชนา – สญฺเจตนิกา สุกฺกวิสฺสฏฺฐิ สงฺฆาทิเสโสติ อยํ ภนฺเต ตตฺถ มูลปญฺญตฺติฯ

ปุจฺฉา – กตมา ปนาวุโส ตตฺถ อนุปญฺญตฺติฯ

วิสฺสชฺชนา – อญฺญตฺร สุปินนฺตาติ อยํ ภนฺเต ตตฺถ อนุปญฺญตฺติฯ

ปุจฺฉา – กตมา ปนาวุโส ตตฺถ ปริปุณฺณปญฺญตฺติฯ

วิสฺสชฺชนา – สญฺเจตนิกา สุกฺกวิสฺสฏฺฐิ อญฺญตฺรสุปินนฺตา สงฺฆาทิโสติ อยํ ภนฺเต ตตฺถ ปริปุณฺณปญฺญตฺติฯ

ปุจฺฉา – สาธารณ ปญฺญตฺตินุโข อาวุโส อสาธารณ ปญฺญตฺตินุโขฯ

วิสฺสชฺชนา – อสาธารณปญฺญตฺติ ภนฺเตฯ

ปุจฺฉา – ตตฺถ อาวุโส อุปกฺกมิตฺวา อสุจิํ โมเจนฺโต กติ อาปตฺติโย อาปชฺชติฯ

วิสฺสชฺชนา – อุปกฺกมิตฺวา ภนฺเต อสุจิํ โมเจนฺโต ติสฺโส อาปตฺติโย อาปชฺชติ, เจเตติ อุปกฺกมติ มุจฺจติ อาปตฺติ

สงฺฆาทิเสสสฺส , เจเตติ อุปกฺกมติ น มุจฺจติ อาปตฺติ ถุลฺลจฺจยสฺส, ปโยเค ทุกฺกฏํฯ

ปุจฺฉา – เกสํ อาวุโส อนาปตฺติฯ

วิสฺสชฺชนา – ฉนฺนํ ภนฺเต อนาปตฺติ สุปินนฺเตน โมเจนฺตสฺส น โมจนาธิปฺปายสฺส อุมฺมตฺตกสฺส ขิตฺตจิตฺตสฺส เวทนาฏฺฏสฺส อาทิกมฺมิกสฺส อิเมสํ โข ภนฺเต ฉนฺนํ อนาปตฺติฯ

ปุจฺฉา – ปญฺจนฺนํ อาวุโส ปาติโมกฺขุทฺเทสานํ กตเมน อุทฺเทเสน อุทฺเทสํ อาคจฺฉติฯ

วิสฺสชฺชนา – ปญฺจนฺนํ ภนฺเต ปาติโมกฺขุทฺเทสานํ ตติเยน อุทฺเทเสน อุทฺเทสํ อาคจฺฉติฯ

ปุจฺฉา – จตุนฺนํ อาวุโส วิปตฺตีนํ กตมา วิปตฺติฯ

วิสฺสชฺชนา – จตุนฺนํ ภนฺเต วิปตฺตีนํ สีลวิปตฺติฯ

ปุจฺฉา – กา อาวุโส วิปตฺติฯ

วิสฺสชฺชนา – อสํวโร ภนฺเต วิปตฺติฯ

ปุจฺฉา – กา อาวุโส สมฺปตฺติฯ

วิสฺสชฺชนา – สํวโร ภนฺเต สมฺปตฺติฯ

ปุจฺฉา – กา อาวุโส ปฏิปตฺติฯ

วิสฺสชฺชนา – น เอว รูปํ กริสฺสามีติ ยาวชีวํ อาปาณโกฏิกํ สมาทาย สิกฺขติ สิกฺขาปเทสุ อยํ ภนฺเต ปฏิปตฺติฯ

ปุจฺฉา – กติ อาวุโส อตฺถวเส ปฏิจฺจ ภควตา อุปกฺกมิตฺวา อสุจิํ โมเจนฺตสฺส สงฺฆาทิเสโส ปญฺญตฺโตฯ

วิสฺสชฺชนา – ทส ภนฺเต อตฺถวเส ปฏิจฺจ ภควตา อุปกฺกมิตฺวา อสุจิํ โมเจนฺตสฺส สงฺฆาทิเสโส ปญฺญตฺโต สงฺฆสุฏฺฐุตาย…เป.… วินยานุคฺคหายฯ

ปุจฺฉา – กตฺถ อาวุโส ฐิตํฯ

วิสฺสชฺชนา – สิกฺขากาเมสุ ภนฺเต ฐิตํฯ

ปุจฺฉา – เก อาวุโส ธาเรนฺติฯ

วิสฺสชฺชนา – เยสํ ภนฺเต วตฺตติ เต ธาเรนฺติฯ

ปุจฺฉา – กสฺส อาวุโส วจนํฯ

วิสฺสชฺชนา – ภควโต ภนฺเต วจนํ อรหโต สมฺมาสมฺพุทฺธสฺสฯ

ปุจฺฉา – เกนาวุโส อาภตํฯ

วิสฺสชฺชนา – ปรมฺปราย ภนฺเต อาภตํฯ

ปุจฺฉา – อตฺถิ นุโข อาวุโส ตตฺถ สนิทาเน สปทภาชนีเย สวินีตวตฺถุเก อุปเนตพฺพํ วา อปเนตพฺพํ วา อกฺขรปทปจฺจาภฏฺฐํ วา วิรทฺธปทพฺยญฺชนํ วาฯ

สํคายนตฺถาย สงฺฆสฺส ญาปนํ

สุณาตุ เม ภนฺเต สงฺโฆ อายสฺมนฺตํ วิจิตฺตสาราภิวํสํ ติปิฏกธร ธมฺมภณฺฑาคาริกํ ปฐมสฺส สงฺฆาทิเสส สิกฺขาปทสฺส นิทานมฺปิ ปุจฺฉิํ, ปุคฺคลมฺปิ ปุจฺฉิํ, วตฺถุมฺปิ ปุจฺฉิํ, ปญฺญตฺติมฺปิ ปุจฺฉิํ, อนุปญฺญตฺติมฺปิ ปุจฺฉิ, อาปตฺติมฺปิ ปุจฺฉิํ, อนาปตฺติมฺปิ ปุจฺฉิํ, อญฺญานิปิ เอวรูปานิ อเนกานิ ปุจฺฉิตพฺพฏฺฐานานิ ปุจฺฉิํ, ปุฏฺโฐ ปุฏฺโฐ จ โส อายสฺมา วิจิตฺตสาราภิวํโส วิสฺสชฺเชสิ, อิติหิทํ ภนฺเต ปฐม สงฺฆาทิเสส สิกฺขาปทํ สปริวารํ นิมฺมลํ สุปริสุทฺธํ ตสฺเสว ภควโต วจนํ อรหโต สมฺมาสมฺพุทฺธสฺสฯ

ตสฺมา ยถาปุเร มหากสฺสปาทโย มหาเถรวรา โปราณสํคีติการา พฺรหฺมจริยสฺส จิรฏฺฐิติยา พหุชนหิตาย พหุชนสุขาย โลกานุกมฺปาย อตฺถาย หิตาย สุขาย เทวมนุสฺสานํ ธมฺมวินยํ สํคายิํสุเจว อนุสํคายิํสุจ, เอวเมว มยมฺปิ สพฺเพว ฉฏฺฐสํคีติมหาธมฺมสภา ปริยาปนฺนา อิทํ ปฐมํ สงฺฆาทิเสส สิกฺขาปทํ นิทานโต ปฏฺฐาย เอกจฺจานํ วจสา สชฺฌายวเสน เอกจฺจานํ มนสา มนสิกรณวเสนจ เอกโต คณสชฺฌายํ กตฺวา สํคาเยยฺยามฯ

ปุจฺฉา – ยํ เตน อาวุโส ภควตา…เป.… สมฺมาสมฺพุทฺเธน มาตุกาเมน สทฺธิํ กายสํสคฺคํ สมาปชฺชนฺตสฺส จ, มาตุคามํ ทุฏฺฐุลฺลาหิ วาจาหิ โอภาสนฺตสฺส จ, มาตุคามสฺส สนฺติเก อตฺตกาม ปาริจริยาย วณฺณํ ภาสนฺตสฺส จ, สญฺจริตฺตํ สมาปชฺชนฺตสฺส จ สงฺฆาทิเสโส กตฺถ ปญฺญตฺโตฯ

วิสฺสชฺชนา – สาวตฺถิยํ ภนฺเต ปญฺญตฺโตฯ

ปุจฺฉา – กํ อาวุโส อารพฺภ ปญฺญตฺโตฯ

วิสฺสชฺชนา – อายสฺมนฺตํ ภนฺเต อุทายิตฺเถรํ อารพฺภ ปญฺญตฺโตฯ

ปุจฺฉา – กิสฺมิํ อาวุโส วตฺถุสฺมิํ ปญฺญตฺโตฯ

วิสฺสชฺชนา – อายสฺมา ภนฺเต อุทายิตฺเถโร มาตุคาเมน สทฺธิํ กายสํสคฺคํ สมาปชฺชิ, อายสฺมาเยว ภนฺเต อุทายิตฺเถโร มาตุคามํ ทุฏฺฐุลฺลาหิ วาจาหิ โอภาสิ, อายสฺมาเยว ภนฺเต อุทายิตฺเถโร มาตุคามสฺส สนฺติเก อตฺตกาม ปาริจริยาย วณฺณํ อภาสิ, อายสฺมาเยว ภนฺเต อุทายิตฺเถโร สญฺจริตฺตํ สมาปชฺชิํ, ตสฺมิํ ภนฺเต วตฺถุสฺมิํ ปญฺญตฺโตฯ

6. กุฏิการ สงฺฆาทิเสส สิกฺขาปุจฺฉา

ปุจฺฉา – ยํ เตน อาวุโส…เป.… สมฺมาสมฺพุทฺเธน สญฺญาจิกาย กุฏิํ การาเปนฺตสฺส สงฺฆาทิเสโส กตฺถ ปญฺญตฺโตฯ

วิสฺสชฺชนา – อาฬวิยํ ภนฺเต ปญฺญตฺโถฯ

ปุจฺฉา – กํ อาวุโส อารพฺภ ปญฺญตฺโตฯ

วิสฺสชฺชนา – อาฬวิเก ภนฺเต ภิกฺขู อารพฺภ ปญฺญตฺโตฯ